Ni wanamichezo ambao uwezo,talanta na rekodi zao zitasalia katika kumbukumbu za historia kwa muda mrefu .Wengine wameshastaafu lakini wenzao bado wapo katika tasnia ya michezo.Wikii hii tunakupakulia safari za wanamichezo wa kipekee ambao wameng'ara na kuacha mifano ya kuigwa katika aina mbali mbali ya michezo.Leo tunamuangazia bondia Floyd Mayweather Jr
Floyd Joy Mayweather Jr. amestaafu kutoka masumbwi na sasa anamiliki kampuni yake ya kusimamia mchezo huo wa masumbwi ama ndondi inayoitwa Mayweather Promotions.
Ni baba wa watoto watano, mkubwa ni Koraun, ana miaka 21, anayefuata ni binti yake Iyanna mwenye miaka 20, Zion kijana wa miaka 19 na binti yake wa mwisho ana miaka 16 anaitwa Jirah.
Devion Cromwell, mtoto wa mpenzi wake wa zamani Melissa Brim, anamtaja kama mtoto wake aliyemuasili, licha ya taratibu zingine ambazo hazikuwa zimekamilika. Koraun, Zion na Jirah amezaa na Josie Harris wakati Iyanna amezaa na muigizaji, mfanyabiashara na mtangazaji wa TV, Melissa Brim.
Mayweather anatajwa kama bondia mahiri kuwahi kutokea katika kipindi cha miaka 25 iliyopita, na kinachomuweka juu pengine kuliko mabondia wengine wakali kama Mike Tyson, Alexander Holified ni rekodi yake ya kushinda mapambano yake yote 50 ya kulipwa bila kupigwa hata pambano moja.
Sifa yake kubwa ni ugumu wake akiwa ulingoni, makonde yake ya nguvu na akili ya kumkabili mpinzani bila kujali kimo na uwezo wake.
Familia na Maisha yake ya utotoni
Mayweather Jr akiwa na baba yake na mwalimu wake wakati huo, Mayweather Sr
Floyd Joy Mayweather Jr. alizaliwa Februari 24, 1977 huko Michigan Marekani katika familia ya wanamasumbwi. Baba yake, Mayweather Sr. alishawahi hata kupambana na bondia mkali, Sugar Ray Leonard.
Baba zake wadogo Jeff na Roger Mayweather, walikuwa mabondia pia wakulipwa, huku mama yake akiwa anaishi katika maisha ya mihangaiko kutokana na athari za matumizi ya dawa za kulevya.
Aliishi na mama yake katika nyumba ndogo ambayo chumba kimoja walilazimika kulala mpaka watu 8 huklo New Jersey. Alikuwa anakuta mabomba ya sindano ya dawa za kulevya na hali ilizidi kuywa mbaya kwa wazazi wake.
Baba yake pia aliwahi kushtakiwa kwa ulanguzi wa dawa za kulevya na kuwekwa ndani. Kwa sababu hiyo akalazimika kulelewa zaidi na bibi yake. Alikuwa ni mtu wa hasira na chuki kwa sababu alihisi kama wazazi wake hawamtendei haki kumlea inavyopaswa. Anasema hasira zake ndizo zilizomuingiza kwenye masumbwi. Aliacha shule huko Ottawa Hills na kuanza kujiendeleza kwenye masumbwi. Mayweather alikuwa anatamani sana kuwa bondia.
Pamoja na yeye kushindwa kumaliza shule, amekuwa mstari wa mbele kusaidia watoto wake wapate elimu. 'Nafurahi kuona wakipata elimu', aliwahi kunukuliwa na vyombo vya habari .
Mwisho wa Twitter ujumbe, 1
Akimsifia sana bibi yake ambaye yeye ndiye aliyegundua kipaji kikubwa cha masumbwi alichojaliwa bondia huyo.
Alivyojiingiza kwenye masumbwi
Ingawa haiko wazi hasa lini alijitupa rasmi kwenye masumbwi lakini alikuwa na rekodi nzuri wakati wa mwanzo mwanzo alipoanza kucheza ndondi za ridhaa. Kutokana na aina yake ya kucheza ngumi kwa kujilinda alipewa jina la'pretty boy'.
Mayweather alipigana mapambano 92 ya ngumi za ridhaa, alipoteza manane, na kushinda 84. Alishinda tuzo ya bondia bora 'Golden Gloves' mara tatu, huku akipoteza kwenye nusu fainali ya mashindano ya Olympic ya mwaka 1996 dhidi ya mbulgaria, Serafim Todorov katika maamuzi yaliyokuwa na utata na kuzua gumzo.
Mayweather aliingia kwenye ndondi za kulipwa mwaka huo huo wa 1996 akapigana pambano lake la kwanza la kulipwa dhidi ya Roberto Apodaca na kushinda kilaini.
Aliendelea kuwachapa makonde mpaka mwanzoni mwa mwaka 1998 na pambanano yake mengi alishinda kwa knockout. Uwezo wake ukaanza kuangaliwa na dunia na alipofikisha pambano lake la 14 la kulipwa, baba yake Mayweather akaamua kuwa kocha wake baada ya kutoka gerezani.
Toka akiwa kijana, Maywheather alionyesha ishara ya kuwa bondia mkubwa duniani
Ujuzi na uwezo wake ukaongezeka maradufu na ilimchukua miaka miwili ya kucheza ngumi za kulipwa kuweza kutwaa taji la kwanza la dunia la uzito wa WBC Super Featherweight (130 lb) akimtwanga bingwa wa dunia wa uzito huo Genaro Hernandez, mwaka 1998.
Baada ya hapo kila aliyekuja alimtwanga wakiwemo wakali kama Carlos Rico, Justin Juuko, Carlos Gerena, Emanuel Burton, Oscar De la Hoya, Shane Mosley, Manny Pacquiao, Conor McGregor na Victor Ortiz;
Katika wote Mayweather anasema hatasahau pambano lililomtoa jasho kabisa dhidi ya Diego Corrales. Katika miaka yote kwa mara ya kwanza Mayweather alidondoshwa chini akiwa ulingoni dhidi ya Carlos Hernandez ilikuwa Mei 26, 2001 katia raundi ya 6 ingawa pambano hilo lilimalizika kwa Mayweather kushinda.
Rekodi za aina yake , mafanikio na utajiri
Mayweather akitangwaza kushinda dhidi ya Manny Pacquiao kwenye pambano lililoweka rekodi ya pesa la mwaka 2015
Mayweather ana rekodi ya kuvutia katika miaka yake zaidi ya 20 aliyocheza ndondi, akicheza mapambano 50 ya kulipwa na kushinda yote. Hajapigwa pambano hata moja, akishinda mapambano 27 kwa KO.
Kwa sababu ya uwezo wake, Mapambanao mengi aliyoshiriki yalimuingizia pesa nyingi. Kwa mfano alivyomtwanga Manny Pacquiao Mei 4, 2015 alijipatia dola 180 million. Alishawahi kustaafu awali lakini Agosti 2017 akalazimika kurejea ulingoni kuzichapa na Conor McGregor. Alishinda mbele ya watazamaji 14,623 katika pambano lililomuingizia zaidi ya dola za kimarekani $300 million.
Floyd Mayweather anajulikana hasa wa jina la 'Money' kwa maana ya pesa, na si haba ni miongoni mwa wanamichezo matajiri ulimwenguni, Kwa mujibu wa mtandano wa wealthygorrilla.com, ulielezwa mwanamasumbwi huyo kuwa na utajiri unaofikia dola $450 million mwaka 2021,Ingawa Mayweather mwenyewe anakana hilo akisema utajiri wake unafikia dola $1.2 billion.
Kwa mujibu wa Forbes, Mayweather aliiingiza zawadi za ushindi kwenye mapambano yake zenye thamani ya dola $1 billion. Huku akitajwa na jarida hilo la Forbes kama mwanamichezo aliyekuwa analipwa Zaidi kuliko yoyote duniani katika kipindi cha miaka mitatu mfululizo 2012, 2013 na 2014.
Matata Ulingoni na matata pia katika mahusiano
Floyd Mayweather akiwa na mmoja wa wapenzi wake wa zamani, Shantel Jackson
Floyd Mayweather Jr amekuwa na wanawake kadhaa katika maisha yake, ingawa hajawahi kuoa hata mmoja. Anachoamini ni kwamba mwanaume anapaswa kuwa na wanawake wengi Zaidi kadri anavyoweza kuwamudu ama kulingana na uwezo wake wa kuwahudumia.
Ameonyesha kwa kuwa na wanawake kadhaa wakiwemo Shantel Jackson aliyeishi naye kwenye mahusiano kwa miaka 8, Doralie Medina, Josie Harris na Liza Hernandez. Akizaa nao watoto wanne, mabinti wawili na wa kiume wawili. Ukiacha Shantel Jackson, Doralie Medina, Josie Harris na Liza Hernande inaeleezwa amewahi kutoka na wanawake wengine maarufu kama Mariah Carey, Lindsay Lohan, Lil Kim, Rozanda 'Chilli' Thomas, Keyshia Cole, Melissa Brim na Gallienne Nabila.
Floyd Mayweather na Josie Harris aliyezaa nae watoto watatu
Mwaka 2014 anatajwa kwamba alikuwa na mahusiano kwa wakati mmoja na Doralie Medina, Lauren Wood, Princess Love, Keyshia Cole na Shantel Jackson aliyezaa naye na aliyekuwa anajulikana zaidi. Mwenyewe hakuwahi kuthibitisha kuwa na wapenzi hao kwa wakati mmoja ila alipouliza ana wanawake wangapi alisema, "Wanawake wangapi ninao kwa sasa?Labda saba, ndio saba.
"Tunatoka pamoja kula,wakati mwingine tunasafiri pamoja. Kuna na mwanamke mmoja, ni sawa na kutokuwa na mwanamke kabisa," Moja ya kauli tata kwenye vyombo vya habari iliyowahi kutolewea na Mayweather kuhusu mahusaiano yake. Yeye anaamini mwanaume anapaswa kuwa na wanawake wengi zaidi kwa kadri anavyoweza ama kwa kadri ya uwezo wake. Hajaoa mpaka sasa, kwa imani kwamba kuoa ni kujifunga kwa mwanamke mmoja.
Kwa mahusiano yanayofahamika na yasiyofahamika, mitandao inaripoti bondia huyo huenda akawa amekuwa na wanawake zaidi ya 50, ingawa wapo wanaosema pengine 26. Mwenyewe hajathibitishi kuhusu hilo, licha ya kwamba anaendelea kutajwa kama bondia mtata kwenye mahusdiano.
Bondia huyo anaendelea kusubiri kama anaweza kubadili mawazo yake na kuingia katika ndoa.
Maisha tata ya Mayweather Jr nje ya Ulingo
Floyd Mayweather Jr amekuwa akikutwa na makosa mengi hasa dhidi ya wanawake
Floyd Mayweather Jr ana mafanikio makubwa kwenye ndondi lakini maisha binafsi yako tofauti kabisa, hayashawishi, hayalingani na mafanikio yake. Ingawa mafanikio ya mtu kwenye taaluma fulani hayatafsiri mafanikio mengine kwenye maisha ya kawaida ama mahusiano. Mayweather amekuwa akitajwa kama mwanamichezo mtata, akisema maisha yake ya utotoni yamechangia alivyo leo.
Mwaka 2002, alifungiwa kwa miezi sita kutokana na vitendo vyake vya unyanyasaji. Mwaka 2004, alipewa adhabu ya kufanya kazi za jamii kwa masaa 100 na faini ya dola $1000 kwa makosa dhidi ya wanawake.
Mwaka 2020, aliyekuwa mpenzi wake na mama ya watoto wake watatu Josie Harris alimshtaki kwa unyanyasaji na kumfanya akamatwe na kauchiwa kwa dhamaa ya dola $30,000.
Kuelekea pambano lake dhidi ya Manny Pacquiao, mpenzi wake mwingine wa zamani alimshitaki akitaka amlipe dola $20 million kwa kumdhihaki kwa kumwambia ni mtumiaji wa dawa za kulevya.
Huyu ndiye Floyd Mayweather anayeendelea kuishi maisha ya kifahari licha ya kustaafu masumbwi akiishi kwenye kasri la kisasa lenye vyumba vitano huko Las Vegas Valley, ambalo lina kila kitu ikiwemo gym kubwa anayoiita 'Mayweather Boxing Club'.